“Raden Permadi, Nom-nomane Janaka”
(Satriya tanpa cacad baguse uleng-ulengan)
Raden Permadi, Premadi utawa Pamade iku nom-nomane Arjuna satriya
Panengah Pandhawa, putrane Prabu Pandhudewanata. Permadi iku satriya bagus
tanpa cacad. Kasektene pilih tandhing. Mangka bisa mabur lan bisa ngilang,
pusakane pirang-pirang, ampuh kabeh. Uga dhemen ulah tapa lan ngangsu kawruh.
Watak watune andhap-asor, ora seneng ngumumake kaluwihane, lan dhemen tetulung
marang sapadha-padha, tur tansah ngayomi marang sing ringkih. Mula iku, akeh
sing nresnani. Garwane pirang-pirang. Ana lima sing dianggep onjo sinebut-sebut
lan cinandra kanthi becik ana ing Serat Candranini yasan pujangga Mangkunegara
IV, yaiku Wara Sumbadra, Dewi Manohara, Dewi Ulupi, Dewi Gandawati lan Wara
Srikandhi.
Sipat-sipate Permadi sing andhap-asor, seneng tetulung lan
mbangun turut ngestokake dhawuh iku, bisa diwuningani antara liya ing lakon
Bima Bothok utawa Bima Bumbu. Ing lakon Kangsa Adu Jago, Permadi mbantu
Brastasena ngalahake Suratimantra, sarana nyelupake kerise kang ampuh ing banyu
sendhang kang dadi sumber uripe buta gedhe surasekti kuwi.
Nalika iku Prabu Anom Kangsa wis bisa nangkep Kakrasana lan
Narayana, nanging kanthi sesidheman dipanah dening Permadi, saengga Kakrasana
lan Narayana ucul, banjur merjaya Kangsa. Permadi uga tau meguru marang Begawan
Padmanaba, kang uga gurune Narayana.
Postingan
